पुणे : ‘व्यवसायाला प्रोत्साहन देण्यासाठी ‘गोल्डन ट्युलिप इव्हेंट्स’च्या वतीने ‘घे भरारी’ या तीन दिवसीय फन-फूड महोत्सवाचे आयोजन करण्यात आले आहे. तीन ते पाच जानेवारी २०२० या कालावधीत शुभारंभ लॉन्स येथे सकाळी ११ ते रात्री नऊ या वेळेत हा महोत्सव होत आहे. लघु उद्योग, गृहउद्योग करणाऱ्या व्यावसायिकांना यामध्ये प्राधान्य देण्यात आले आहे. हे प्रदर्शन सर्वांसाठी विनामूल्य खुले आहे,’ अशी माहिती संयोजक राहुल कुलकर्णी, नीलम उमराणी-यदलाबादकर, संदीप चाफेकर आणि समीर देशपांडे यांनी पत्रकार परिषदेत दिली.
राहुल कुलकर्णी म्हणाले, ‘प्रदर्शनाचे हे तिसरे वर्ष आहे. महोत्सवाचे उद्घाटन शुक्रवारी, तीन जानेवारी २०२० रोजी सकाळी १२ वाजता माजी आमदार मेधा कुलकर्णी यांच्या हस्ते होणार आहे. नोकरी सोडून लोकांनी व्यवसायात उतरावे, हा प्रदर्शनाचा मुख्य उद्देश आहे. नोकरी सांभाळून जे लोक व्यवसाय करतात अशांसाठी हे व्यासपीठ उपलब्ध करून दिले आहे. राज्यभरातून चवदार खाद्यपदार्थ, गृहसजावटीच्या वस्तू, हस्तकला, आयुर्वेदिक औषधे, ट्रॅव्हल्स, लाईफ इन्श्युरन्स, दागिने अशा विविध प्रकारच्या वस्तू, सेवा यांचे स्टॉल्स येथे असतील. लहान मुलांसाठी खेळ, तर गृहिणींसाठी मेहंदी, टॅटू याचीही सोय आहे. कोल्हापुरी मिसळ, कटवडा, नागपुरी वडाभात, पुडाची वडी, खानदेशी शेवभाजी, कोकणी बिरड्याची उसळ, घावन, विविध प्रकारचे थालीपीठे, मोदक, गुळपोळी, पुरणपोळी, खवापोळी अशा असंख्य पदार्थांची चव पुणेकरांना चाखता येईल. याशिवाय मनीषा निश्चल यांच्या गाण्यांची मैफल, जादूचे प्रयोग, चैताली माजगावकर यांचा ‘पपेट शो’ असे मनोरंजनाचे विविध कार्यक्रमही होणार आहेत. त्यामुळे या महोत्सवात लहानांपासून प्रौढांपर्यंत सर्वांना एकाच ठिकाणी मनोरंजन, खाद्यपदार्थांचा आस्वाद आणि खरेदीचा आनंद लुटता येणार आहे.’
‘या प्रदर्शनाचे प्रमुख आकर्षण मतिमंद पुनवर्सन केंद्राचा स्टॉल असणार आहे. यामध्ये जुन्या कपड्यापासून केलेल्या पिशव्या, पायपुसणी यासह विविध अन्य प्रकार विक्रीसाठी ठेवणार आहेत. तसेच कोल्हापुरातील इचलकरंजी येथील मुक कर्णबधीर वरुण बरगाले यांचा अडॉरेबल व्हाईट कलेक्शन असा आगळा वेगळा स्टॉल असणार आहे. ख्यातमान वादक उमेश्वर भुवन हे ‘कहोन’ हे जागतिक संगीतात वापरले जाणारे वाद्य याविषयी कार्यशाळा घेणार आहेत,’ असेही राहुल कुलकर्णी यांनी नमूद केले.
